Narón, 15 de Xullo de 2011.- O Alcalde de Narón, Xosé Manuel Blanco, ofreceu hoxe unha recepción institucional ós representantes dos grupos que actúan mañá no 21º Festival Folclórico Internacional, que se celebrará a partires das 21:00 horas no Pazo da Cultura, con entrada gratuita.

O rexedor deulles a benvida e amosouse “convencido de que disfrutaredes de Narón, ó igual que os veciños de Narón disfrutaremos coas vosas danzas e bailes”. Xosé Manuel Blanco destacou que unha das prioridades do goberno municipal é o fomento da cultura e a defensa das raíces, e que por ese motivo este festival lévase realizando durante máis de dúas décadas. “O Festival Folclórico Internacional é unha aposta decidida, algo intrínseco do municipio. Non se entendería o verán en Narón sen este evento” sinalou.

A continuación, fíxose un intercambio de regalos no que o Alcalde obsequiou ós grupos participantes con diferentes libros sobre a historia e o turismo de Narón.

Os grupos que mañá subirán ó escenario do Pazo da Cultura son os seguintes:

-Grupo Municipal de Coros e Danzas de “Baza” (Andalucía).

-Asociación Artístico-Cultural e Recreativa “Berriztasuna Tadela” (Euskadi).

-Ballet folclórico de “Temuco” (Chile).

-Agrupación “Otrora” (Colombia).

-KUD “PKB KORPORACIJA” (Serbia).

-Banda de Gaitas do Padroado de Cultura de Narón.

-Grupo de Danza Tradicional “Alxibeira” do Padroado de Cultura de Narón.