Narón, 3 de outubro de 2023. O Pazo da Cultura acollerá mañá a terceira das seis proxeccións programadas con motivo do ciclo “Cine eterno, películas que fixeron historia”, impulsado polo Cineclube Serie B en colaboración co Padroado da Cultura e da Federación de Cineclubes de Galicia. Esta semana poderase ver ás 20.00 horas o filme “El apartamento”, de Billy Wilder. O protagonista desta película é o empregado dunha compañía de Manhattan, solteiro e que presta o seu apartamento aos seus superiores para as súas citas amorosas, coa esperanza de que eles lle correspondan para mellorar a súa situación laboral. Será unha muller, amante dun dos xefes, a que fará que a situación experimente un cambio radical nesta historia. A vindeira cita será o 11 de outubro, cando se proxectará “El golpe”, de George Roy (1973), e o ciclo continuará o día 18 con “La vida de Bryan”, de Terry Jones (1979), para rematar o 25 deste mes coa película “Lost in translation”, de Sofía Coppola (2003). A entrada a este ciclo de cine é de balde.