NARON, 8 de Novembro de 2007.- Segundo explicou a Edil, moitas das cartas que se enviaron ás agrupacións de Narón están a chegar de volta ó Concello, por causas descoñecidas. “Ata o momento, xa recibimos 42 cartas, e aínda van a seguir chegando máis”, explicou a Concelleira. Por este motivo, Natalia Hermida propón a tódalas asociacións ás que non chegou a documentación “que se poñan en contacto coa Concellería de Participación Cidadá, co fin de pór ó día a súa información”. Hermida explicou que no mes de Outubro enviáronse 205 notificacións por correo e repartíronse outras 40 cartas en mano. Do total de avisos, o Concello xa recibiu a resposta de 30 asociacións, que actualizaron os seus datos no departamento de Estatística a partires da documentación aportada pola Concellaría de Participación Cidadá. Non obstante, a Edil quere que o proceso de actualización dos datos poida chegar a tódalas agrupacións veciñais, culturais, de maiores, deportivas, xuvenis, empresariais e ANPAS de Narón. Dende a Concellería de Participación Cidadá xa se mantivo un primeiro encontro con organización veciñais, de maiores, xuvenís e culturais, no que se lles explicou o proceso a seguir para pór ó día os seus datos administrativos. Aquelas agrupacións que o desexen poden contactar coa Concelleira Natalia Hermida no horario de atención ó público, os martes de 11 a 13 horas na 3ª planta do Concello, ou ben chamando por teléfono ó Consistorio.