Narón, 19 de novembro de 2015. Os actos programados polo Concello con motivo do Día de Narón, festividade local que se conmemora o vindeiro día 23, comenzarán a desenvolverse na xornada do 20 de novembro na cidade. A vixésimo sétima edición da Gala do Deporte abrirá a programación a partir das 21.00 horas no Pazo da Cultura. Na cita, como é tradicional, premiarase aos mellores deportistas e clubes locais. As actividades continuarán a fin de semana. A praza de Galicia acollerá, baixo unha carpa, unha trintena de postos de venta de produtos ecolóxicos e artesáns. A feira abrirá en horario de mañá e tarde os días 21 e 22, de 11.00 a 14.00 e desde as 16.00 ata as 19.00 horas. Na xornada dominical desenvolverase ademais a primeira das edicións das andainas “Ponte en ruta con nós”, programadas desde a área municipal de Deportes. Os camiñantes sairán ás dez da mañá das inmediacións do pavillón polideportivo da Gándara e percorrerán a pé a ruta “Camiñando polos carrís bici” o tramo comprendido entre A Gándara e Xuvia, nun tempo aproximado de dúas horas. O Día de Narón, o luns 23, as actividades previstas comezarán ás 11.00 horas baixo a carpa instalada na praza de Galicia. No citado espazo exporanse traballos realizados ao longo do ano nas actividades desenvolvidas nas asociacións de veciños e tamén haberá unha degustación gastronómica –de balde- a base de lacón e liscos, e un magosto popular. Así mesmo, instalaranse varios inchables para os nenos e nenas, que tamén terán a oportunidade de participar nos obradoiros que se celebrarán durante a tarde na praza de Galicia. A xornada estará amenizada por un grupo musical.