Narón, 2 de marzo de 2016. O Concello de Narón mantén aberto ata o vindeiro 20 de marzo o período de solicitude de praza nas Escolas Infantís Municipais para o curso 2016-2017. A edil de Ensino, Mercedes Taibo, recordou que se ofertarán para o seguinte curso (tendo en conta xa as reservas realizadas) un total de 120 prazas –en xornada completa- nas garderías da Solaina, A Gándara e Piñeiros. En horario de tarde, entre os tres centros, poderían ofertarse ata un total de 30 prazas. As vacantes por cada unha das tres escolas infantís serían: dezaseis para bebés nados no ano 2016 (48 en total); dez para os do ano 2015 (30 en total) e catorce para os de 2014 (42). As persoas interesadas en solicitar praza poden facelo presentando a solicitude correspondente no Rexistro de Entrada do Concello, de luns a venres en horario de 8.30 a 13.30 e os sábados de 9.00 a 13.00.