Narón, 17 de marzo de 2016. O Pazo da Cultura acollerá o día 19 de marzo a representación da obra teatral “Foucellas”, da compañía Talía Teatro. Esta peza dramática, de case unha hora e media de duración, está escrita e dirixida por Cándido Pazó e o elenco artístico compóñeno Artur Trillo, Toño Casais, Dani Trillo e María Ordóñez. A posta en escena terá lugar a partir das 20.00 horas e as entradas poden adquirirse na taquilla do Pazo a un prezo de 9,50 euros para o público en xeral e de 6,65 para abonados, persoas con carné xove ou de estudante (ata 25 anos) e desempregados. Os protagonistas –un maquis, un guerrilleiro e un home de monte (un “foucellas”)- representarán un atraco con secuestro incluído dun labrador e a súa muller. Esta peza de ficción ten entre os seus obxectivos levar aos espectadores e espectadoras a un momento histórico moi concreto, facéndoos reflexionar sobre cómo administrar unha derrota.