Narón, 7 de abril de 2016. Un grupo de vinte e cinco nenos e nenas de cinco anos do colexio da Solaina visitou o Concello. Os menores percorreron diferentes estancias da Casa Consistorial acompañados por persoal municipal e mestras do citado centro escolar da localidade. Unha vez no salón de plenos foron recibidos polo alcalde, José Manuel Blanco, que conversou animadamente cos nenos e nenas, respostou ás preguntas que lle realizaron e entregoulles un agasallo. Foi tamén o salón de plenos o lugar no que os menores presenciaron a proxección dun vídeo con imaxes do Concello, da bandeira institucional, e tamén dalgunhas instalacións municipais, como a Biblioteca do Alto. A visita desta mañá sumouse ás que periodicamente se realizan co alumnado de diferentes centros educativos da localidade ao longo do curso escolar.