Narón, 23 de abril de 2016. A Compañía de Servizos Medioambientais do Atlántico (Cosma) anunciou un novo corte no subministro de auga que terá lugar na noite do día 24 de abril. Desde a empresa puntualizaron que a medida responde á necesidade de reformar a tubaría xeral de abastecemento, unha tarefa que hai que executar para poder realizar o cruce de estrada para a obra do interceptor xeral de abastecemento. O corte no subministro de auga comezará o domingo día 24 ás 22.00 horas e rematará o luns día 25, ás 8.00 horas. A medida afectará aos números pares da estrada de Castela, desde o cruce deste vial coa avenida Concepción Arenal (non tendo efectos nos inmobles desta última vía) ata a intersección da estrada de Castela coa avenida Conde de Fenosa (tamén sen efecto nesta última vía). As rúas transversais á estrada de Castela no citado tramo tamén se verán afectadas polos cortes do subministro ou, nalgúns casos, por baixadas de presión no mesmo. O concelleiro de Servizos, Ibán Santalla, recordou que se trata dunha medida como a que se levou a cabo nas xornadas dos pasados luns e martes e explicou que se traballa durante as noites para afectar o menos posible á poboación. Así mesmo, o edil pediu novamente desculpas á veciñanza polas molestias que poidan ocasionar os cortes no subministro de auga durante esas horas.