Narón, 22 de maio de 2017. O Concello de Narón colaborará coa Asociación de Celíacos de Galicia con motivo da conmemoración, o vindeiro 27 de maio, do Día Nacional do Celíaco. O edil de Sanidade, Octavio Dopico, indicou que desde o mércores 24 ata o luns 29 deste mes, permanecerá colocada na entrada do Consistorio unha bandeira co logotipo do Día Nacional do Celíaco. O goberno local de Narón amosará deste xeito a súa colaboración coa entidade e o seu respaldo ás persoas celíacas en canto á divulgación desta enfermidade, que impide ás persoas que a padecen comer alimentos con glute (por provocar trastornos na súa absorción), presente nas sementes de cereais como o trigo, a avea, a cebada e o centeo.