Narón, 27 de xuño de 2018. A parroquia de Piñeiros acollerá o vindeiro sábado día 30, a sexta edición do Encontro de Rondallas Cidade de Narón. A cita será un ano máis no campo da festa da parroquia e dará comezo ás 18.30, tal e como anunciou a concelleira de Festas, Mar Gómez. O Concello e a AVV Piñeiros organizan esta convocatoria, recordou, na que actuarán as formacións Los nostálgicos, as rondallas Trovadores (Ares), e Lucero del Alba (Neda) e a Agrupación Artística Ferrolana Bohemios. Na xornada do domingo, día 1 de xullo, terá lugar tamén na parroquia de Piñeiros a décimo cuarta edición do Encontro de Bandas de Gaitas “Memorial Lolete”, que dará comezo ás 11.30 horas. Neste evento actuarán as bandas Fereñas (Vilarmaior), Xunqueira de Ambía (Ourense) e Agarimo de Catabois (Ferrol). O programa dominical contará a maiores cun apartado gastronómico, coa celebración da undécima edición da Festa do Churrasco, que dará comezo ás 14.00 horas e estará amenizada polo grupo musical Maracuyá. A concelleira de Festas convidou ás veciñas e veciños a acudir a estes eventos festivos que se sucederán esta fin de semana na cidade, concretamente na parroquia de Piñeiros, donde se organizan con éxito desde hai varios anos.