Narón, 18 de xuño de 2019. A alcaldesa de Narón, Marián Ferreiro, e os portavoces dos grupos políticos municipais: Guillermo Sánchez Fojo (TEGA); Germán Castrillón (PP); David Pita (PSOE) e Olaia Ledo (BNG) reuníronse esta mañá no Concello con representantes do comité de empresa de Poligal. Os integrantes da corporación local escoitaron as demandas dos extraballadores da empresa e reiteráronlles o seu apoio ás súas reivindicacións. A alcaldesa, Marián Ferreiro, comprometeuse a poñerse en contacto co seu homónimo de Ferrol, Ángel Mato, para tratar de actuar conxuntamente, tamén contactando co resto de concellos da comarca, e instar tanto ao Ministerio de Industria como ao Igape a “clarificar tanto as xestións que realizaron dende o inicio do anuncio do peche da planta de Poligal en Narón como a viabilidade de materializar a proposta dalgún dos dous posibles inversores que poderían, según se indicou dende o Igape, adquirir a empresa”. Ferreiro reiterou que “dende o Concello de Narón continuaremos apoiando a todo o plantel despedido de Poligal e seguiremos incidindo, ao lado dos representantes dos traballadores e traballadoras, na necesidade de que se dean pasos en firme para solventar esta situación”.