Narón, 9 de outubro de 2019. O Concello de Narón adherirase á proposta da Federación Española de Dislexia (Fedis) para conmemorar, mañá, o Día Mundial da Dislexia. Así o anunciou o concelleiro de Sanidade, Santiago Galego, que avanzou que se procederá a iluminar pola noite de cor azul –a cor oficial da dislexia- a glorieta de Freixeiro. O Concello apoiará con este acto a citada causa que, tal e como indicaron dende a Federación, afecta a un mínimo dun 10% da poboación. Así mesmo, utilizarase o slogan #UnidosPorLaDislexia como mensaxe de unión nas redes sociais para dar máis visibilidade a este problema de aprendizaxe de orixe neurolóxico. “As persoas con dislexia teñen que facer fronte día a día a unha serie de dificultades á hora de ler e escribir polo que nos sumamos a esta campaña conscientes da importancia de visibilizar a dislexia na nosa sociedade con motivo do Día Mundial da Dislexia”, apuntou Galego.