Concello de Narón
  • Concello de Narón
  • El tiempo en Narón
  • Entrada a Naronmail
Noticias
A PARROQUIA DE SAN MATEO ACOLLERÁ OS ACTOS DO SAMAÍN ORGANIZADO POLO CONCELLO E A AGRUPACIÓN VECIÑAL DE SAN MATEO
O concelleiro de Cultura, Guillermo Sánchez Fojo, presentou xunto con Laura Fernández e José García, da Agrupación Veciñal de San Mateo, os actos que se desenvolverán o día 31 de outubro na parroquia
Narón, 28 de outubro de 2019. O concelleiro de Cultura, Guillermo Sánchez Fojo, e a tesoureira e o secretario da Agrupación Veciñal San Mateo de Trasancos, Laura Fernández e José García, respectivamente, presentaron esta mañá no Concello o programa de actos do Samaín Trasancos, que terá lugar este xoves, día 31 no Centro Cívico Social da parroquia e nas súas inmediacións. A partir das 17.00 horas haberá unha exposición das cabazas realizadas nos centros de ensino da cidade que participaron nun obradoiro que, ao igual que anos anteriores, se impulsou a través do Padroado da Cultura de Narón. Tamén ás 17.00 horas darán comezo uns obradoiros de cabazas e maquillaxe dirixidos a persoas de diferentes idades. A música desta xornada festiva chegará ás 19.00 horas da man de Xoán Curiel, que interpretará “A Casa do Terror”: Neste concerto cóntase unha historia protagonizada por un grupo de amigos e amigas que teñen que durmir nunha casa encantada e donde vivirán terroríficas historias, á par que divertidas. Posteriormente, sobre as 20.30 iniciarase en San Mateo a tradicional “Comitiva de Luces e Tebras”, que consiste nun percorrido de aproximadamente un quilómetro e medio polas inmediacións do Centro Cívico Social da parroquia. No mesmo poderán participar todas as persoas que o desexen, portando candeas para alumear na escuridade o camiño que percorrerán pola zona na noite do Samaín. Unha vez rematada a “Comitiva de Luces e Tebras”, sobre as 21.00 horas, será o turno do “Obradoiro do Medo”, que un ano máis se desenvolverá nas instalacións do CRA de San Mateo. As persoas que se acheguen ata alí terán a oportunidade de vivir unha serie de experiencias tenebrosas, propias desta xornada do Samaín. Finalmente, o grupo de Gaitas do Padroado da Cultura de Narón pechará o programa, sobre as 21.15 horas, interpretando varias pezas de música tradicional. As persoas que acudan ao Samaín de San Mateo tamén poderán degustar, a un prezo simbólico dun euro, racións de caldo elaborado por veciñas e veciños da parroquia, acompañado de liscos, pan e bebidas. Dende a Agrupación Veciñal San Mateo de Trasancos agradeceron a colaboración prestada dende o Concello para poder organizar este programa. Así mesmo, o concelleiro de Cultura, Guillermo Sánchez Fojo, destacou o traballo que realiza a entidade por manter vivas tradicións como a do Samaín e animou á veciñanza a acudir a esta cita “unha das máis festexadas na parroquia de San Mateo e que cada ano reúne a preto de medio milleiro de persoas”.

<<< Febreiro 2023 >>>

LMMXVSD
 
1
2
3
4
5
6
7
8
9
10
11
12
13 14
15
16
17
18
19
20
21
22
23
24
25
26
27
28
 
Eventos do Concello
www.naron.es