Narón, 20 de novembro de 2019. A concelleira de Igualdade de Narón, Mar Gómez, animou aos propietarios de establecementos comerciais e de hostalería locais, así como ás entidades deportivas e veciñais da cidade a achegarse ata o Concello para solicitar material promocional da campaña “En Negro contra as violencias” (“Narón en Negro”) á que se adheriu un ano máis o Concello de Narón. “As persoas que desexen recibir material deben dirixirse ao terceiro andar do Concello, se ben tamén teñen a opción de descargar documentos co lema da campaña a través da páxina web do Concello: www.naron.es”, explicou Gómez. A edil indicou que, polo momento, aínda queda dispoñible cartelería, pegatinas e camisetas co lema “Narón en Negro” e anima á cidadanía a publicitar esta campaña, centrada na loita contra a violencia de xénero. Así mesmo, Gómez recordou que na web municipal se pode descargar o programa de actos co que se conmemorará dende o Concello o 25N, Día Internacional contra a violencia de xénero, e que se desenvolverán ata finais deste mes en diferentes ubicacións da cidade. O vindeiro luns día 25, ás 12.00 horas, será o acto central na Praza da Gándara, que consistirá na lectura dun manifesto contra a violencia e unha ofrenda floral fronte ao Monumento á Muller. “Convidamos ás veciñas e veciños a asistir a este acto, co que dende o Concello naronés queremos amosar a máis enérxica repulsa ás violencias machistas”, subliñou Gómez.