Narón, 11 de novembro de 2020. O Concello de Narón mantén aberto ata o 25 de novembro –ás 14.00 horas- o prazo para solicitar as axudas do PEL Reactiva da Deputación da Coruña. A documentación relativa a este plan, dirixido a microempresas e persoal autónomo con ou sen empregados/as ao seu cargo e ao que se adheriu o Consistorio pode consultarse a través da Sede Electrónica: sedeelectronica.naron.es. Dende o Concello trasladouse a importancia de que todas as persoas interesadas en tramitar estas axudas consulten periodicamente a Sede Electrónica, donde se irán publicando os criterios que traslada a Deputación da Coruña sobre as consultas que fai o Concello de Narón. Mañá mesmo subirase un documento cunhas aclaracións sobre as Sociedades Civís con personalidade xurídica que indican quen pode ser beneficario/a desta liña de axudas. A contía global reservada para Narón é de 457.292,79 euros e as axudas a conceder para paliar os efectos da crise derivada da Covid-19 serán de 1.500, 2.000, 2.500 ou 3.000 euros, en función dos requisitos. Entre os gastos subvencionables do PEL Reactiva-Concello de Narón están a compra de material antiséptico ou desinfectante, produtos de hixiene e limpeza; arrendamentos de maquinaria, vehículos, locais, adaptación dos locais ás medidas de protección fronte á Covid-19, seguros e subministro de servizos, podendo consultarse todos os casos nas bases da convocatoria.