Narón, 10 de decembro de 2020. O Pazo da Cultura acollerá esta fin de semana dous espectáculos. Con motivo das actuais indicacións sanitarias, o aforo actual do Pazo da Cultura está limitado a 250 persoas, polo que aínda quedan dispoñibles algunhas entradas tanto para o concerto “Contrapunto”, de Tanxugueiras, como para a obra teatral “O mel non caduca”, de Ibuprofeno Teatro. O grupo de música folk Tanxugueiras actuará mañá no Pazo, ás 20.30 horas, presentando o seu novo disco, "Contrapunto", un repertorio que incide na recuperación da tradición das pandereteiras e integrada con harmonías de diferentes estilos de música galega, da man de Olaia e Sabela Maneiro e Aida Tarrío. Na xornada do sábado será o turno da compañía Ibuprofeno Teatro, que ás 20.00 horas representará a obra “O mel non caduca”, unha traxicomedia biodegradable e ecosostible sobre a obsolescencia programada da relación do ser humano cos obxectos e da degradación ecolóxica do planeta por mor da perversa lóxica capitalista, do crecemento e do consumo masivo de produtos. As entradas para cada unha destas propostas culturais no Pazo teñen un prezo de 9,50 euros para o público xeral e de 6,65 para abonados, desempregados/as e persoas con carné xove ou de estudante (ata 25 anos).