Narón, 14 de xaneiro de 2021. O paseo marítimo de Xuvia conta cunha nova caseta con dous baños adaptados que permanece aberta dende as 9.00 ata as 21.00 horas. O edil de Servizos, Ibán Santalla, recordou que “este espazo público da cidade conta dende hai varios anos cunha caseta de aseos e tras ter que substituír a colocada inicialmente por unha alugada, ahora xa dispoñemos doutra propia que supuxo un investimento de case 16.000 euros para dispoñer de dous aseos, un para homes e outro para mulleres, totalmente accesibles”. As instalacións permanecen dende o inicio da mesma ubicación. “Consideramos que é un servizo moi necesario nesta zona da cidade, un paseo marítimo, que é frecuentado a diario por moitas persoas”, asegurou Santalla, que explicou que “a diario, se realizan as pertinentes tarefas de limpeza e desinfección que requiren este tipo de instalacións e que se incrementaron con motivo da actual situación sanitaria”. O edil naronés fixo un chamamento á cidadanía para que entre todas e todos “manteñamos en condicións óptimas este tipo de servizos, ao igual que o mobiliario urbán, para que a cidade estea nas mellores condicións”.