Narón, 16 de marzo de 2021. Unha unidade móbil da Axencia para a Doazón de Órganos e Sangue (ADOS) desprazarase nos vindeiros días 23, 24 e 25 de marzo á cidade. Nas xornadas do martes 23 de marzo e mércores 24 de marzo o vehículo localizarase ao carón do centro de saúde, na rúa 25 de Xullo, entre as 15.30 e as 21.00 horas. Durante a xornada do xoves 25 de marzo, a unidade móbil permanecerá estacionada nas inmediacións da Praza da Constitución, na Solaina, en horario de 15.30 a 21.00 horas. Debido á actual situación sanitaria e para escalonar a afluencia de doadores/as trabállase con cita previa para evitar esperas, podendo chamar para reservala as persoas que o desexen ao número de teléfono (de balde): 900 100 828. O persoal das unidades móbiles de ADOS e dos locais de doazón segue exhaustivos protocolos de seguridade para a prevención da Covid-19. Aquelas persoas que acudan a doar sangue deben almorzar previamente e, no caso de xantar, esperar dúas horas antes de realizar a extracción. Haberá que presentar ao persoal da unidade móbil a tarxeta de doazón, o DNI ou algún documento similar e informar ao médico no caso de que se estea tomando algún medicamento. Cada día os hospitais galegos precisan entre 400 e 500 doazóns de sangue para manter a súa actividade e a colaboración cidadá é fundamental.