Narón, 29 de setembro de 2021. O concelleiro de Seguridade Cidadá, Román Romero, informou que dende mañá ás 22.00 horas e ata o venres ás 10.00 horas se rexistrarán cortes de tráfico intermitentes e suprimiranse temporalmente as prazas de estacionamento na estrada de Cedeira. A medida afectará a todo o vial dende a confluencia coa estrada de Castela ata o límite co veciño concello de Valdoviño. O edil explicou que as restricións a aplicar son para que a Xunta de Galicia acometa as obras comprometidas no firme do citado vial, que se levarán a cabo na franxa horaria indicada, tal e como se trasladou ao Consistorio naronés.