Concello de Narón
  • Concello de Narón
  • El tiempo en Narón
  • Entrada a Naronmail
Noticias
O CONCELLO ACOLLERÁ A FINAIS DE MAIO O "XI ENCONTRO ESCOLAR DE XOGOS TRADICIONAIS"
O Padroado da Cultura de Narón e a asociación Brinquedia organizan a cita, que terá lugar o vindeiro 27 de maio nas instalacións do colexio do Feal, en horario de mañá e tarde
Narón, 24 de abril de 2017. O alumnado dos centros educativos públicos e concertados e centros de ensino non universitario de Galicia é o destinatario das actividades programadas na undécima edición do “Encontro escolar de xogos tradicionais”, organizado polo Padroado da Cultura de Narón e pola asociación Brinquedia (Rede Galega do Xogo Tradicional). A vicepresidenta do organismo, Marián Ferreiro, presentou esta mañá a iniciativa xunto co secretario de Brinquedia, Iván Montes, e con Xabier López e Alberto Casal, coordinador de voluntariado e colaborador, respectivamente, da citada asociación. A cita, avanzou a edil, terá lugar o sábado 27 de maio nas instalacións do colexio do Feal, en horario de 11.00 a 18.00. Ferreiro destacou a importancia deste tipo de propostas en canto contribúen, subliñou, “a difundir o patrimonio lúdico galego entre a cidadanía e a recuperar unha gran variedade de xogos tradicionais, ao tempo que fomentar un espazo de relación entre o alumnado, profesorado e as familias que participen”. Os representantes de Brinquedia e a vicepresidenta do Padroado da Cultura animaron á cidadanía a implicarse nesta convocatoria, participando activamente nos xogos programados para esta nova edición do “Encontro escolar de xogos tradicionais”. O secretario de Brinquedia explicou que “os xogos da mañá están máis pensados para o público infantil, se ben pola tarde haberá máis presencia dos dirixidos aos adultos, aínda que tamén poderá participar o alumnado”. Carreiras de sacos, zancos, chapas, arrastraboias, corda, ra, brilé, peón, pano, tres pés e carrilanas forman parte da trintena de xogos cos que poderán gozar os asistentes á convocatoria. Persoal voluntario dos Centros de Formación Profesional Ferrolterra, de Ferrol, e do Ángel Casal da Coruña dirixirán os xogos que terán lugar en horario de mañá. Ás 14.00 horas haberá un descanso para xantar e, xa pola tarde, a partir das 15.30 horas, terá lugar o espectáculo teatral (para público familiar e infantil), Paporrubio, a cargo da compañía que leva o mesmo nome. A continuación darán comezo as exhibicións de billarda, loita galega, cocha, chaves, lanzamento de goxo e birlos celtas e tamén os obradoiros de construción de enredos, nos que as nenas e nenos terán a oportunidade de elaborar os seus propios xoguetes, axudados por monitores. Sobre as 18.00 horas está previsto o remate do Encontro, coa entrega duns agasallos aos participantes. As persoas que desexen participar poderán inscribirse a través dos centros educativos ata o vindeiro 11 de maio. Para obter máis información pódese consultar a páxina web: http://brinquedia.net.

<<< Marzo 2024 >>>

LMMXVSD
 
1
2
3
4
5
6
7
8
9
10
11
12
13
14
15
16
17
18
19
20
21 22
23
24
25
26
27
28
29
30
31
Eventos do Concello
naron.gal