Narón, 9 de outubro de 2019. O Pazo da Cultura acollerá esta fin de semana o espectáculo No Camiño, da compañía Setestrelo, e un concerto de Jorge Drexler, que ofrecerá en Narón a única presentación en Galicia do seu último traballo, “Silente”. As entradas dispoñibles poden adquirirse na billeteira do Pazo ou na web do Padroado da Cultura: www.padroadodecultura.es, se ben as do concerto de Jorge Drexler están a día de hoxe a piques de esgotarse. “No Camiño” é un percorrido polos camiños de Santiago que entran en Galicia, no que se mesturan a fotografía, o vídeo, a presentación teatralizada, o canto e a música. O espectáculo poderá verse este venres, día 11, a partir das 20.30 horas, e ten unha duración aproximada de hora e media. A través desta presentación a compañía Setestrelo aposta por levar ao público a través do Camiño de Santiago dende a súa butaca, poñendo en valor a música galega, tanto de autor como temas compostos para este camiño en concreto. As entradas teñen un prezo de 5 euros para o público xeral e poderán entrar de balde os menores de 10 anos. Na xornada do sábado, día 12, será o turno do cantautor Jorge Drexler, que presentará o seu último traballo, “Silente”. Drexler regresa a un dos seus formatos máis celebrados, cunha guitarra e a súa voz, combinados con caixas de ritmos para xerar paisaxes sonoras e visuais ao servizo da forma das súas cancións. Trátase dun concerto unipersoal, en formato solista, e co silencio como materia prima e marco para a comunicación no que o público terá unha actitude activa co silencio moi presente. As entradas teñen un prezo de 20 euros para o público xeral e de 14 para abonados, desempregados ou persoas con carné xove ou de estudante (ata 14 anos).