Narón, 10 de decembro de 2020. A concelleira de Ensino e Bibliotecas, Mercedes Taibo, anunciou a posta en marcha, un ano máis, da campaña “Cos meus mellores desexos”, impulsada a través do Servizo de Normalización Lingüística de Narón. En colaboración coa Mesa pola Normalización Lingüística e coincidindo coa campaña “Nadal 2020” promovida tamén polo Concello, con esta nova iniciativa os comercios da cidade que o desexen poderán recoller, de balde, etiquetas adhesivas para colocar nos envoltorios dos agasallos que merquen as clientas e clientes dos seus establecementos, tal e como indicou Taibo. As mensaxes son moi variadas “Cos meus mellores desexos”, “Parabéns”, “Quérote”… e para recibir estas etiquetas é preciso contactar con Servizo de Normalización Lingüística do Concello, no quinto andar, se ben tamén se poden solicitar a través do teléfono 981 337 700 (extensión 1516) ou do correo electrónico: a.pita@naron.es. Taibo indicou que xa se informou á Asociación de Comerciantes de Narón desta iniciativa e recalcou que está aberta a todas as persoas que desexen participar. “Queremos impulsar o uso do galego no comercio local e de aí esta proposta, que levamos a cabo dende o ano 2016 e a través da que fomentamos o uso da nosa lingua como un valor engadido, asociado á proximidade, calidade e autenticidade”, asegurou.