Narón, 16 de abril de 2021. A administración autonómica anunciou que os establecementos de hostalería que estean operativos deberán descargar de novo do portelo da Xunta os carteis nos que se informa sobre a capacidade máxima no exterior e interior do local, debido a que se realizarán unha serie de cambios sobre os emitidos inicialmente trala entrada en vigor das novas medidas da desescalada. Os hostaleiros deberán facilitar os datos do seu establecemento, entre outros, e comprobarase se se corresponden con restaurantes para que, nese caso, así figure no novo documento e poidan permanecer abertos ata as 23.00 horas. O resto de establecementos de hostalería deberán continuar co horario de peche ás 21.00 horas. Os restaurantes poden abrir dende hoxe ata as 23.00 horas se dispoñen desa licenza específica, con reserva previa, rexistro de clientela e ventilación con medidor de CO2, este último requisito a partir do día 23 deste mes.