Narón, 5 de novembro de 2021. A concelleira de Benestar Social de Narón, Catalina García, participou nunha actividade do proxecto Ártabro Inclusivo que se levou a cabo nesta ocasión no Museo da Construción Naval de Ferrol. Baixo o lema "Fóra do mar o plástico ten valor", e ao abeiro do proxecto Tanza do Golfo Ártabro Norte, incidiuse na posta en valor do medio mariño e da responsabilidade individual no coidado dos mares e océanos, recalcando a importancia de calquera pequena acción nesa liña. García estivo acompañada polo xerente da Fundación Exponav, José María Cardona, destacando este último a importancia de eliminar o plástico do océano e convidando aos asistentes ao acto a coñecer o Museo da Construción Naval. Pola súa banda, o pescador e influencer Rogelio Santos abordou a importancia dos xestos individuais para preservar o medio ambiente, da necesidade de cumprir a normativa para garantir o futuro dos mares e tamén de que é preciso dar exemplo, especialmente dende o mundo da política e os sectores con maior visibilidade. Na súa intervención a concelleira naronesa recordou que Ártabro Inclusivo, a iniciativa dos concellos de Narón, Ferrol e Fene ao abeiro do GALP, ten como finalidade erradicar a contaminación mariña e poñer en valor o plástico que se retira do mar. "O noso obxectivo é involucrar a toda a sociedade, e especialmente ao colectivo de pescadores e mariscadores nesa limpeza", apuntou. García destacou que se trata "dunha iniciativa cunha vertente de inclusión social e laboral para dar unha segunda vida ao plástico e na que se encargarán desa reciclaxe persoas de Aspaneps e Saúde Mental Ferrol, Eume e Ortegal a través duns obradoiros que contan coa colaboración da Universidade e o Centro Integrado de Formación Profesional Ferrolterra".