Narón, 15 de Outubro de 2010.- O Concello de Narón e a Cruz Vermella Española asinaron hoxe un convenio de colaboración mediante o cal a institución municipal achegará 14.000 euros para a realización de actividades de interés social realizadas ó longo deste ano 2010. O acordo foi refrendado hoxe polo Alcalde de Narón, Jose Manuel Blanco, e o representante da Cruz Vermella Española en Ferrol, Francisco Vázquez Fontela. Na firma do mesmo tamén estivo presente a Concelleira de Deportes de Narón, Natalia Hermida. Ó amparo deste convenio, a Cruz Vermella Española desenvolveu un programa de formación consistente en tres cursos de primeiros auxilios para familias de nenos de 0 a 3 anos de idade (celebrados nas Escolas Infantís Municipais de A Gándara, Piñeiros e A Solaina), e presta ó longo deste ano o servizo de ambulancias en actos ou eventos de concurrencia de público –cunha previsión máxima de 35 eventos-. Os cursos de formación en primeiros auxilios para bebés e nenos tiveron unha duración de 10 horas cada un, e serviron para proporcionar ós pais, nais e cuidadores os coñecementos elementais para aprender a previr accidentes, aplicar procedementos e técnicas axeitadas en autoprotección e soporte a primeiros auxilios, e identificar e resolver situacións de urxencia vital.