Narón, 10 de Abril de 2012.- O Alcalde de Narón, José Manuel Blanco, e a presidenta de Aspaneps (Asociación de Nenos con problemas psicosociais), Paula Martínez, asinaron hoxe un convenio de colaboración para desenvolver un programa de intervención social, dirixido a nenos/as en risco psicosocial e ás súas familias. Na actualidade, esta entidade atende a 30 familias do municipio de Narón, dentro do acordo asinado co Concello para este ano 2012. A principal novidade do acordo firmado hoxe é que o Concello de Narón recupera a achega económica que foi aportada no ano 2010, que ascende a 15.000€, e que tivo que ser recortada no 2011 (fixada en 9.500€) debido á crise económica. O Alcalde de Narón, José Manuel Blanco, destacou a colaboración entre administracións e asociacións para chegar ó conxunto da sociedade, asegurando que “a pesares dos difíciles momentos económicos que estamos a vivir, fixemos un esforzo por recuperar a colaboración que tíñamos no ano 2010”. Pola súa banda, a Concelleira de Acción Social, Catalina García, destacou tamén o traballo que dende Narón se fixo “por manter as políticas sociais porque pensamos que son prioritarias e nesa liña imos seguir traballando”. Pola súa banda, a presidenta de Aspaneps agradeceu ó Concello o incremento do convenio, especialmente nun momento no que “temos recortes por todas partes” declarou. Ó abeiro deste convenio, Aspaneps está a realizar un programa de intervención social a través dos proxectos de “Intervención Familiar” e “Intervención coa Infancia e Risco Psicosocial” atendendo tanto a nenos/as coma ás súas familias.