Concello de Narón
Espa�ol
Entrada a Naronmail
 

Deportes Cultura
Deportes Cultura
Policía Local de Narón dameuntoke
Policía local Mocidade
Concellería de Igualdade Biblioteca de Narón
Igualdade Biblioteca de Narón
Turismo de Narón Do berce á rúa
Turismo Do berce á rúa
Outras webs Narón, Cidade Fidalga
Outras Webs Narón, Cidade Fidalga
Servizo de Normalización Lingüística Buscocole
Servizo de Normalización Lingüística Buscocole
Novas
 
JOSÉ MANUEL BLANCO RENUNCIOU NUN PLENO EXTRAORDINARIO AO SEU CARGO COMO ALCALDE E ENTREGOU O BASTÓN DE MANDO A MARIÁN FERREIRO
JOSÉ MANUEL BLANCO RENUNCIOU NUN PLENO EXTRAORDINARIO AO SEU CARGO COMO ALCALDE E ENTREGOU O BASTÓN DE MANDO A MARIÁN FERREIRO
Blanco abandona a política municipal tras trinta e catro anos formando parte da corporación local naronesa, os oito últimos como alcalde, e Marián Ferreiro pasa a ser a primeira muller en ostentar a Alcaldía de Narón
Narón, 23 de setembro de 2017. O pleno extraordinario celebrado esta mañá no Concello acolleu a renuncia oficial de José Manuel Blanco como alcalde de Narón, despois de oito anos no cargo e trinta e catro formando parte da corporación local na cidade. Foi o propio Blanco o encargado de cederlle durante a sesión o bastón de mando á nova alcaldesa de Narón, Marián Ferreiro, que obtivo catorce votos favorables –os sete edís da oposición abstivéronse- para relevar ao ata hoxe rexedor local. Ferreiro é oficialmente desde esta mañá a primeira muller en recibir o bastón de mando da cidade.
Tralo inicio do pleno e a renuncia de Blanco como alcalde interviñeron todos os portavoces dos grupos políticos municipais. O voceiro de ENE, Alfonso Casal desexoulle sorte na súa vida persoal e tamén á nova alcaldesa e a continuación tomou a palabra o portavoz de EU, André Abeledo, que tamén lle desexou sorte ao alcalde na súa xubilación e asegurou, en referencia a Ferreiro, que “terá a man do noso partido tendida nesta nova etapa”.
O voceiro do BNG, Pablo Villamar tamén tivo palabras de eloxio para o ata hoxe alcalde da cidade. “Foi un pracer estar participando con vostede nas políticas deste Concello”, para a continuación “desexarse o mellor nesta nova etapa e que fóra do Concello poidamos seguir véndonos”. Finalizada a intervención de Villamar tomou a palabra a portavoz do PSOE, Catalina García, que lle agradeceu a Blanco o feito de que “tivera en conta desde o primeiro momento as propostas achegadas polo PSOE de Narón”. García recalcou que “foi capaz de sentarse, dialogar, escoitarnos e chegar a puntos de encontro polos cidadáns de Narón”, e desexoulle “o mellor nesta nova andadura”.
A última das intervencións foi a do portavoz do PP, Marcos López, que asegurou que “os partidos ganan porque a xente os elixe e vostede gañou dúas veces porque os veciños así o decidiron. Agradecémoslle os anos de servizo, desexámoslle sorte e recordámoslle que teremos sempre a nosa porta aberta para unha persoa que estivo trinta e catro anos no Concello”.
En nome de Terra Galega, Guillermo Sánchez Fojo pechou o turno de intervencións dos voceiros, recordando que leva xunto a Blanco máis de trinta anos na política e algúns máis no apartado persoal. “Das dez corporacións democráticas que se cumprirán no Concello formou parte de nove, polo que vostede si que é parte da historia de Narón”. “Foi alcalde na época máis difícil da economía española e neste Concello, desde a súa chegada, cambiou totalmente a forma de traballar, podendo falar as cousas”, asegurou o representante de TEGA. Sánchez Fojo valorou o traballo realizado por Blanco e, de xeito especial, o feito de que “cando estabas na cresta da ola eres capaz de marchar para a casa” antes de darlle as grazas en nome de Terra Galega e no seu propio.
Tras escoitar aos portavoces dos grupos municipais, José Manuel Blanco agradeceu as súas verbas. “Fostes un exemplo de que se pode facer política dende o sosego e a serenidade, defendendo as vosas ideas pero sempre con respecto aos demais”. Destacou tamén Blanco o traballo do equipo de goberno en xeral, dos seus compañeiros e compañeiras de TEGA e do persoal do Concello “pola súa entrega e capacidade e por estar sempre a disposición da veciñanza”. Despois de dar as grazas ao resto de funcionarios e funcionarias asegurou: “Voume coa cabeza alta porque tentei sempre o mellor para os nosos veciños e veciñas, Voume satisfeito do traballo realizado en Narón durante todos estes anos, pero tamén me ides permitir que pida desculpas, sobre todo á miña familia polas horas adicadas ao Concello sacrificando moitas veces a atención que eles requerían e tamén a todos aqueles que se puideron sentir molestos nos últimos anos”. Blanco rematou desexando moita sorte á nova corporación.
Tralos aplausos dos compañeiros de corporación e do público asistente votouse o recoñecemento da renuncia de Blanco, que se aprobou para, a continuación, proceder á elección do novo alcalde. A primeira tenente de alcalde e concelleira de Cultura, Marián Ferreiro, obtivo catorce votos a favor –dos vinte e un da corporación-, aceptou o cargo e prometeu cumprir as súas obrigas no mesmo, sendo proclamada por José Manuel Blanco alcaldesa de Narón e recibindo da súa man o bastón de mando ante os aplausos do público.
Ferreiro tomou a continuación a palabra agradecendo o respaldo das súas compañeiras e compañeiros de bancada. Comprometeuse a “traballar arreo para honrar do mellor modo as ensinanzas que nos aprendeu Blanco, o cal deixa un espazo que é un desafío ocupar e a quen non poido deixar de agradecer nun día tan especial como o de hoxe que creese en min”. A alcaldesa de Narón destacou tamén o voto de confianza do PSOE e BNG coa súa persoa e o proxecto de goberno do tripartito e anunciou á oposición que “manterei o estilo dialogante de quen me precedeu”. Marián Ferreiro valorou o cadro de persoal municipal e incidiu, con respecto a esta nova etapa, en que “as mulleres levamos tempo tomando os espazos públicos e debemos continuar facéndoo, porque sabemos gobernar, porque podemos, e porque temos que seguir abrindo brecha para as demais”.
“Ao final, todos os esforzos tradúcense en historias, corenta mil historias… unha desas historias é a de Xulia (a súa filla) que cada vez que pasea por Narón sinte como propios os logros colectivos que conseguimos en todos estes anos: o Pazo da Cultura xa o sinte como seu, o parque de Freixeiro é seu e a Pena Molexa forma parte dos seus contos. Xulia lémbrame neses momentos por qué é importante seguir facendo de Narón ese sitio do cal sentirse orgulloso desde a primeira infancia, e esa é a máis grande motivación e ese é o meu compromiso convosco”, subliñou a alcaldesa de Narón.
Ao remate da intervención Marián Ferreiro recibiu as felicitacións das compañeiras e compañeiros de corporación, persoal do Concello, familiares e amigos e, a continuación, todos degustaron un ágape no Consistorio.



Últimas novasu Tódalas novas

<<< Marzo 2019 >>>

LMMXVSD
 
1
2
3
4
5
6
8
9
10
11
12
13
15
16
17
19
22
23
24
26
27
29
30
31
Eventos do Concello
   
 
Concello de Narón - Aviso legal