O "II ENCONTRO INTERNACIONAL DE COROS" CELEBRARASE ESTE SÁBADO NO AUDITORIO MUNICIPAL
A concelleira de Cultura, María del Carmen Espada, recordou que a entrada a este evento, no que participarán tres formacións, é de balde
Narón, 26 de setembro de 2018. O Auditorio municipal acollerá o vindeiro sábado, día 29, a segunda edición do Encontro Internacional de Coros organizado pola Sociedade Cultural Areosa, de Piñeiros, en colaboración co Padroado da Cultura de Narón. A cita, con entrada de balde, dará comezo ás 18.00 horas, tal e como recordou a concelleira de Cultura, María del Carmen Espada.
A formación encargada de abrir este festival será a Coral de Areosa, que dará paso á actuación do Orfeão de Ovar, unha agrupación procedente do municipio portugués do mesmo nome, do distrito de Aveiro, e pechará a convocatoria deste ano o coro Mendibaiarte Abesbatza, de Euskadi. O vindeiro ano serán os anfitrións, a coral de Areosa, os encargados de desprazarse tanto ao País Vasco como a Portugal para actuar nos eventos que organicen nas súas respectivas cidades de orixe as agrupacións que este ano participan no II Encontro Internacional de Coros.
A concelleira de Cultura recordou que preto de medio cento de persoas forman parte da coral de Areosa, que iniciou a súa andaina musical no ano 1995. A edil naronesa destacou o labor que a agrupación realiza na cidade e noutros municipios e convidou á cidadanía a asistir ao evento deste sábado para poder escoitalos xunto coas dúas corais convidadas.