A ALCALDESA E EDÍS DA CORPORACIÓN LOCAL ASISTIRÁN MAÑÁ Á CONCENTRACIÓN EN DEFENSA DA CENTRAL DE ENDESA
Marián Ferreiro respaldará xunto con concelleiros do goberno local as demandas do plantel de Endesa, as compañías auxiliares e os transportistas do carbón en defensa do futuro da central e dunha transición enerxética xusta
Narón, 15 de outubro de 2019. A alcaldesa da cidade, Marián Ferreiro, desprazarase mañá a Madrid para acudir á concentración convocada ás 16.00 horas fronte ao Congreso dos Deputados en defensa do futuro da central de As Pontes. En representación do goberno local acudirán tamén o viceportavoz de TEGA, Guillermo Sánchez Fojo, e os edís Ibán Santalla, Pablo Mauriz, Mercedes Taibo e Santiago Galego.
Os representantes do equipo de goberno da cidade respaldarán en Madrid ao plantel da térmica de As Pontes, ao colectivo de transportistas do carbón e tamén ao persoal das empresas auxiliares que traballa na central pontesa. Ferreiro destacou que “dende Narón apoiaremos unha vez máis coa nosa asistencia a estes colectivos e ao pobo das Pontes, coincidindo na necesidade de activar canto antes un plan de reindustrialización e reivindicando unha transición enerxética xusta en defensa dos postos de traballo de centos de familias”.