As entradas están á venda no despacho de billetes do Pazo e na web do Padroado da Cultura
Narón, 15 de febreiro de 2024. A compañía Almamahler Productions traerá a Narón este sábado a ópera “Otello”. O Pazo da Cultura acollerá o concerto, que dará comezo ás 20:00 horas e terá unha duración dunhas dúas horas e media. Con música de Giuseppe Verdi e libreto en italiano de Arrigo Boito, a ópera baséase na traxedia homónima de William Shakespeare, estreada o 5 de febreiro de 1887 en Milán.
“Otello” é unha historia de amor e odio, de ambición desmedida e, sobre todo, dos ciumes e as mentiras que traen consigo. A peza conta a historia de Otello, que tras derrotar aos turcos foi nomeado gobernador da illa de Chipre, na que residiu coa súa muller. Yago, un dos seus alféreces que odiaba a Otello por nomear capitán a Casio, fai que se sembre no corazón de Otello a dúbida de se a súa muller lle é infiel con este último.
As entradas poden adquirirse no despacho de billetes do Pazo ou na web do Padroado da Cultura: www.padroadodecultura.es, a un prezo de 35 euros para o público xeral e de 24,50 para desempregados, abonados e persoas con carné xove ou de estudante.